huzuur aap kaa bhii ehataraam karataa chaluu.N
Shadab Lahori

huzuur aap kaa bhii ehataraam karataa chaluu.N
idhar se guzaraa thaa sochaa salaam karataa chaluu.N

nigaah-e-dil kii aaKhirii yahii tamannaa hai
tumhaarii zulfo.n ke saaye me.n shaam karataa chaluu.N

u.nhe.n ye zid ki mujhe dekh kar kisii ko na dekh
meraa ye shauq ki sab se salaam karataa chaluu.N

ye mere Khvaabo.n kii duniyaa nahii.n, sahii lekin
ab aa gayaa huu.N to do din kayaam karataa chaluu.N

 

 

 

safar me.n dhuup to hogii jo chal sako to chalo
Nida Fazli

safar me.n dhuup to hogii jo chal sako to chalo
sabhii hai.n bhii.D me.n tum bhii nikal sako to chalo

kisii ke vaaste raahe.n kahaa.N badalatii hai.n
tum apane aap ko Khud hii badal sako to chalo

yahaa.N kisii ko ko_ii raastaa nahii.n detaa
mujhe giraa ke agar tum sambhal sako to chalo

yahii hai zindagii kuchh Khvaab cha.nd ummiide.n
inhii.n khilauno.n se tum bhii bahal sako to chalo

 

 

 

sholaa huu.N bhadakane kii guzaarish nahii.n karataa
Muzaffar Warsi

sholaa huu.N bhadakane kii guzaarish nahii.n karataa
sach muu.Nh se nikal jaataa hai koshish nahii.n karataa

giratii hui diivaar kaa ham_dard huu.N lekin
cha.Date hue suuraj kii parastish nahii.n karataa

[parastish=worship]

maathe ke pasiine kii mahak aaye to dekhe.n
vo Khuun mere jism me.n gardish nahii.n karataa

hamdardii-e-ahabaab se Darataa huu.N 'Muzaffar'
mai.n zaKhm to rakhataa huu.N numaaish nahii.n karataa

[ahabaab=dear ones, friends (plural of habiib); numaaish=display, exhibit]

 

 

 

aap ko bhuul jaaye.n ham itane to bevafaa nahii.n
Tasleem Fazli

aap ko bhuul jaaye.n ham itane to bevafaa nahii.n
aap se kyaa gilaa kare.n aap se kuchh gilaa nahii.n

shiishaa-e-dil ko to.Danaa unakaa to ek khel hai
hamase hii bhuull ho ga_ii unakii ko_ii Khataa nahii.n

kaash vo apane Gam mujhe de de.n to kuchh sukuu.N mile
vo kitanaa badanasiib hai Gam hii jise milaa nahii.n

karanaa hai gar vafaa to kyaa kaise vafaa ko chho.D duu.N
kahate hai.n is gunaah kii hotii ko_ii sazaa nahii.n

 

 

 

mai.n chaahataa bhii yahii thaa vo bevafaa nikale
Waseem Barelvi

mai.n chaahataa bhii yahii thaa vo bevafaa nikale
use samajhane kaa ko_ii to silasilaa nikale

kitaab-e-maazii ke panne palaT ke dekh zaraa
na jaane kaun saa pannaa mu.Daa huaa nikale

jo dekhane me.n bahut hii qariib lagataa hai
usii ke baare me.n socho to faasalaa nikale

 

 

 

Boliyaa.N (punjabi)       N/A

 

 

 

mai.n Khayaal huu.N kisii aur kaa, mujhe sochataa koii aur hai
Saleem Kausar

mai.n Khayaal huu.N kisii aur kaa, mujhe sochataa koii aur hai
sar-e-aaiinaa meraa aks hai, pas-e-aaiinaa koii aur hai

mai.n kisii ke dast-e-talab me.n huu.N, to kisii ke harf-e-duaa me.n huu.N
mai.n nasiib huu.N kisii aur kaa, mujhe maa.Ngataa koii aur hai

kabhii lauT aaye.N to na puuchhanaa, sirf dekhanaa ba.De Gaur se
jinhe.n raaste me.n Khabar huii ki ye raastaa koii aur hai

ajab aitabaar-ba-aitabaarii ke daramiyaa.N hai zindagii
mai.n kariib huu.N kisii aur ke, mujhe jaanataa koii aur hai

vahii mu.nsifo.n kii rivaayate.n, vahii faisalo.n kii ibaarate.n
meraa jurm to koii aur thaa, par merii sazaa koii aur hai

terii roshanii merii Khaddo-Khaal se muKhtalif to nahii.n magar
tuu qariib aa tujhe dekh luu.N, tuu vahii hai yaa koii aur hai

 

 

 

aisaa lagataa hai zindagii tum ho
Bashir Badr

aisaa lagataa hai zindagii tum ho
ajanabii jaise ajanabii tum ho

ab ko_ii aarazuu nahii.n baakii
justajuu merii aaKhirii tum ho

mai.n zamii.n par ghanaa a.Ndheraa huu.N
aasamaano.n kii chaa.Ndanii tum ho

dosto.n se vafaa kii ummiide.n
kis zamaane ke aadamii tum ho

 

 

 

maanaa ke musht-e-Khaak se ba.Dakar nahii.n huu.N mai.n
Muzaffar Warsi

maanaa ke musht-e-Khaak se ba.Dakar nahii.n huu.N mai.n
lekin havaa ke raham-o-karam par nahii.n huu.N mai.n

i.nsaan huu.N dha.Dakate huye dil pe haath rakh
yuu.N Duubakar na dekh samu.ndar nahii.n huu.N mai.n

chehare pe mal rahaa huu.N siyaahii nasiib kii
aa_iinaa haath me.n hai sika.nder nahii.n huu.N mai.n

Gaalib terii zamii.n me.n likkhii to hai Gazal
tere kad-e-suKhan ke baraabar nahii.n huu.N mai.n

 

 

 

denevaale mujhe maujo.n kii ravaanii de de
Shadab Lahori

denevaale mujhe maujo.n kii ravaanii de de
phir se ek baar mujhe merii javaanii de de

ab to jaam ho saaqii ho mere pahaluu me.n
ko_ii to shaam mujhe aisii suhaanii de de

nashaa aa jaaye mujhe terii javaanii kii qasam
tuu agar jaam me.n bhar ke mujhe paanii de de

har javaa.N dil mere afasaane ko doharaataa rahe
hashr tak Khatm na ho aisii kahaanii de de

 

 

 

tum ko ham dil me.n basaa le.nge tum aao to sahii
Mumtaz Mirza

tum ko ham dil me.n basaa le.nge tum aao to sahii
saarii duniyaa se chhupaa le.nge tum aao to sahii

ek vaadaa karo ab ham se na bhichha.Doge kabhii
naaz ham saare uThaa le.nge tum aao to sahii

bevafaa bhii ho sitamagar bhii jafaa peshaa bhii
ham Khudaa tum ko banaa le.nge tum aao to sahii

raah taariiq hai aur duur hai manzil lekin
dard kii shamae.N jalaa le.nge tum aao to sahii

 

 

 

phir usii raahaguzar par shaayad 
Ahmed Faraz 

phir usii raahaguzar par shaayad
ham kabhii mil sake.n magar shaayad

jaan pahachaan se kyaa hogaa
phir bhii ai dost Gaur kar shaayad

muntazir jin ke ham rahe un ko
mil gaye aur hamasafar shaayad

jo bhii bichha.De hai.n kab mile hai.n "Faraz"
phir bhii tuu intazaar kar shaayad